一葉小廚 (已結業)

间中都想出街食下lunch抖下气，是日又黎左一叶，贪佢个午餐几大份够哂饱。午餐牌成年都无转过，今日试下蛋饼同炒米先，饮品依然系不用加钱的蜜蜂红茶。香叶菜圃肉碎蛋饼配卤肉饭，呢度$49，真系几抵食㗎。即叫即煎嘅关系等左都好耐嘅，食晏得一个钟有啲赶，但因为即整所以热辣辣，蛋饼煎得松软，加了九层塔好香口，有四大块好饱肚。卤肉饭多酱，半肥瘦调味对胃，旁边嘅豆角就无乜味啦，当系有啲蔬菜点缀下，半熟蛋流心有蛋汁好味，加埋珍珠米真系几正。同事叫嘅台式咖哩炒米，其实即系香港嘅星洲炒米，哈哈，大同小异啦。味道正正常常，有咖哩香但不辣，米粉幼身弹牙，足料大碟，$52同样抵食。试过转珍珠奶茶但麻麻地，都系饮返蜜蜂红茶好了，冰凉解渴，有茶香又不过甜，不错呀。大件夹抵食，唔怪得要等位嘅。