翠苑甜品專家

营业中

休息中

做完冬嘅翌日做野晏左少少走，屋企留咗羊腩煲俾我，我见天气冻冻地不如买两碗外卖糖水番去一齐食啦！屋企有老人家比较钟意食传统中式糖水，我就去左筲箕湾望隆街嘅翠苑买碗糖水。翠苑嘅前身系大良八记，自大良八记十年前冇做后就接左手。餐厅嘅招牌已经不敌岁月嘅痕迹有啲甩色。由于筲箕湾人口平均年纪偏大，所以传统中式糖水比新式糖水例如芋圆、绵绵冰等更受欢迎～ 即使疫情前，晚上买甜品嘅食客主要为外卖。餐厅嘅餐牌张贴于门外，供客人排队买外卖时可以拣拣心水甜品。基本上数得出嘅中式糖水翠苑都有供应，连比较冷门嘅桑寄生茶同腰果糊（周末限定）都会供应。 =========================== 红豆莲子百合 $17 加 汤圆 2粒 $8红豆沙黎讲$17都尚算合理，不过加汤圆$4/粒就有啲偏贵。外卖番到屋企再整番热食，红豆沙非常「杰」，好似食紧浆糊咁，口感十分麻麻，汤圆似系现成，食落似一早煲好，已经冇左果种烟韧感。 老实讲我呢啲90后都系喜欢食新式糖水多啲，传统中式糖水恕我唔识欣赏。