稻香 (海趣坊)

营业中

休息中

预留咗是晚冬至喺海趣坊稻香一席原价$3388欢聚连年宴，提前一天落订可减$200，同家人享用。餐单有乳猪、龙虾、鲍鱼、龙趸、烧鸡、带子、红烧花胶生翅等等……整餐冬饭，最值得一提系龙虾及烧鸡，其他嘅中规中举。第一道乳猪，皮脆肉嫩，冇肥肉，感觉系唔腻，咸淡适中。第二道上汤龙虾伊面，有3只龙虾，伊面足料，龙虾肉质扎实，味道略淡，但冇影响原味。第三道蚝皇鲍鱼伴金钱，系整晚最差𠮶碟，鲍鱼似系罐头即食鲍，花菇淡而无味，剩得生菜垫底可取。第四道桂花菌炒带子见番啲揸拿，带子肉质嫩滑、微弹，桂花菌爽滑，唯略嫌太少，甜豆嫩绿脆甜，没有草腥味。第五道红烧花胶生翅，汤底清不糊口。第六道龙趸，火候刚好，但鱼味不足。第七道脆皮鸡，要俾个LIKE，皮脆肉嫩，味道恰到好处。第八道淮杞泡菜苗，烹调冇难度，尚算可以。第九道糯米饭，软糯甘香，喺食到水尾嘅情况下，依然感觉可取。而最后那公仔包，里面是莲蓉馅，甜度适中，于是一扫而空。整体而言，拉上补下，团体饭餐嚟讲都达到要求。