好蔡館

营业中

休息中

去开太子唔知食乜好，开Openrice扫吓，见到好蔡馆，见到D食物好似几吸引，所以就去试吓掂唔掂。位置都几'隔涉', 唔睇地图都好易miss咗。店面装修好怀旧，大圆钟，纸皮石，有D花样年华嘅感觉。睇吓餐牌，好多嘢都未听过，有别于一般潮州打冷，搞到我乜都想试！可惜只有两丁友，只可以拣几样试吓。问吓阿姐蚝饼系咪炸𠮶只先？佢话唔系，即点！蚬肉捞饭，好似好正㖞！叫埋。潮州最出名系鱼蛋，咁一定要叫啦！D乜粿物粿都出名，最少两只起，咁叫嚟试吓！唔洗十分钟，香喷喷嘅蚝饼出场，蚝饼系煎嘅，好香鸭蛋味，蚝仔超肥美，有成个五蚊银咁大，好多蚝仔，一D都唔孤寒！点埋鱼露，好味呀！蚬肉捞饭，唔算大碗，但所有材料都切得好仔细，蚬仔肉，韮菜，榄角同珍珠米，口感几好，粒粒分明，只不过油咗少少！鱼蛋+鱼皮饺，汤几鲜，鱼蛋唔同出面𠮶D，冇咁弹，但鱼味重，应该冇沟咁多粉。鱼皮饺细细只，但皮馅薄靓，一啖一只，唔错㖞！最后上嘅系荀粿同韮菜粿，卖相唔错，饺皮呈半透明，可以直接睇到D馅料。咬一啖，皮好烟靱，馅料好新鲜，调味十分到位！令人回无穷！依间店仲有好多嘢想试，要再嚟先得！