十大碗粥麵專家

营业中

休息中

呢间10大碗真系好出名，慕名而来！趁今日经过太子，特登过嚟试吓！由于早过12点到达，人数并不多，我一个人好容易就入到去！由于系中午时间，有午市套餐，睇落去真系几抵食！50几蚊，包个捞面，加埋云吞！仲有嘢饮㖭！性价比好高！本来应该食碗云吞面，但见个餐咁抵食，忍唔住食咗呢个捞面套餐，拣咗牛腩捞拼三粒云吞！最后当然要食埋呢度好好食嘅炸两啦！首先讲吓牛腩捞面，个柱侯牛腩汁系几好食，不过啲牛腩嘅部位有啲麻麻哋，都比较柴！如果啲牛腩部位可以好啲就更加好啦！另外啲捞面走碱水做得唔错，而且啲捞面食得出就蛋味！呢个系出色嘅！跟住讲返啲云吞，食得出啲虾好爽口，都系唔错！另外个大地鱼汤，有好香嘅咸鲜味，我真系成碗饮晒！餐叫咗可乐，而且仲系樽装添，真系几正！跟住讲返个炸两，真系值得一提，个炸两里面嘅油炸鬼系即炸嘅，绝对唔系用啲摆咗好耐嘅油炸鬼！配埋个肠粉皮，个粉浆唔会好厚身，加埋一齐，又脆又腍！真系好正！下次大家嚟记得试吓！漏咗，唔记得讲样嘢，佢啲辣椒油都好正，唔系好辣𠮶种，但有好多炸蒜喺入边，而且肯定系新鲜做，真系好鬼正！