Barg (已結業)

白色情人节食好啲就拣咗铜锣湾呢间西餐厅撑枱脚，我地都系第一次到访。食物质素水准以上，特别喜欢佢地嘅Pepperoni Pizza，食到饱饱再去附近行街就perfect啦！店员先奉上餐包，热烘过嘅餐包几香脆，再配上香草牛油，都几特别！法式焗田螺一粒粒圆滚滚嘅薯蓉映入眼帘，好可爱呢！内里藏有鲜味田螺，本身薯蓉无乜调味，所以田螺鲜味更突出，薯蓉绵滑质感都好出色。龙虾汁蟹肉天使面最期待嘅画面，蟹肉甚多，天使面幼幼好入味，食落顺滑。平时食厌咗意粉嘅朋友都可以试吓呢款天使面。Pepperoni Pizza当天最惊喜就系呢款辣肉肠pizza， 除咗芝士拉丝够芝味外，辣肉肠油份逼出超诱人～本身又带咸香，薄饼薄脆无负担真系令人想一食再食！食物种类同款式都好多，更有唔同主食，不过当日有点饱就无点到肉类，期待下次再一尝。