德美壽司 (裕民坊YM²)

营业中

休息中

观塘裕民坊新楼盘因为疫苗抽奖一炮而红，虽然楼就抽唔到，不过都可以去佢楼下嘅商场YM2行吓，原来呢度仲新开咗德美寿司。德美寿司出名选料上乘，价钱亲民，今日就一于见识下。入面系开放式厨房，仲可以选择坐喺吧枱睇住师傅制作各式各样嘅日本料理。晚市套餐有鱼生丼或定食，选择繁多。晚市定食包括汤及沙律。沙律用上芝麻酱，仲有昆布同面包粒，有益又醒胃。面豉汤鲜味不会太咸，亦有昆布同萝卜片。入嚟德美就已经系谂住食刺身丼，就拣咗德美海胆鱼生丼，除咗有海胆，仲有三文鱼、帆立贝、剑鱼腩、熟虾、蟹棒、三文鱼籽同蟹籽，非常丰富，而且所有刺身都好新鲜，呢个价钱确系抵食。玉子仲印上「德美」呢个生招牌，为呢个刺身丼作点缀。野菜牛肉锅定食一向系我嘅至爱，所以我都拣咗呢个热食。牛肉上枱时呈半熟状态，另外仲有温泉蛋、冬菇、面条，同大量野菜喺入面，蔬菜索晒汤汁非常好味。野菜牛肉锅定食嘅牛肉份量丰富，两个人都好够食。我仲特别加$15转乌冬，乌冬之上仲加入咗昆布同粟米粒，感觉简直系另外一份主食。其实定食系包括甜品，但因为已经好饱，完全忘记咗请店员上甜品，希望下次有机会再试。