東歐餐廳

第一次食乌克兰菜，每款菜色都别具特色，响香港好少机会食到。餐厅位置好近大馆，食饱可以去行阵散步。 餐厅环境好有乌克兰同俄罗斯特色，入去用饍，有种去呢两个地方旅行嘅感觉。先试个传统罗宋汤，有别于响香港平时饮嘅罗宋汤，系完全另一个味道，次试拣咗传统口味，成碗汤红当当，里面有好多红菜头，少量牛肉，饮落甜甜地清清地几开胃之后上咗个鸡肉蘑菇卷同传统蘑菇薯仔饺子。鸡肉蘑菇卷都算大份，食落几creamy；饺子皮偏厚，食落有少少腻口，味道一般，食咗两旧都饱饱地。最后就系招牌菜基辅鸡扒，鸡扒一切落去就爆晒汁，里面嘅牛油流晒出嚟，食落好juicy好嫩口, 一啲都唔鞋口，另外伴碟嘅薯片都炸到十分薄脆惹味，值得推介。唔知今后仲有冇机会可以去乌克兰呢个地方，如果未试过或想重温去乌克兰食过嘅菜色，呢间餐厅会系一个唔错嘅选择。