茶舍 (景福街)

营业中

休息中

今日26/1下昼三点钟左右入去谂住试吓帮衬下午茶，一入去右边见到有一张卡位我哋三个人咪谂住坐埋去啰。但系张枱应该有之前个客刚刚走咗有几只杯喺度，正想坐低之际有个金毛员工后生仔带黑色口罩大约五呎10吋高同我哋用好晦气嘅说话讲（等我执埋张枱先啦）听到已经唔舒服。咁我哋咪冇坐低啰，然后佢拎走咗啲杯我哋就坐埋去，跟住佢返转头攞张枱布想抹枱，跟住又同我哋用好晦气嘅说话同我哋讲（你哋可唔可以起身先呀，等我抹埋张枱先啦）跟住我就忍唔住同佢讲你咪抹啰，点解要我哋起身呀？（其实当时张枱唔系好污糟）跟住佢话惊整污糟我哋，我咪话你小心啲抹咪可以啰。之后佢仲想驳嘴我就同佢讲你嗱嗱声啦！其实抹枱执杯系冇问题㗎，但系用咁嘅态度同语气同客讲就好大问题。如果你系老细睇到呢段嘢，你真系检讨吓你啲员工用咩态度对啲客？今时今日咁嘅服务态度可以咩？香港啲老细成日话冇生意。咁嘅服务态度点会有生意啊。