升哥點心 (已結業)

是日入元朗揾朋友食嘢，朋友带咗我食呢间新式嘅点心。睇睇餐牌的确有啲好特别嘅嘢食，创新类点心。一坐低侍应就问我哋拣饮咩茶，一般酒楼可以饮到嘅茶佢都有，我哋就饮铁观音。啲茶系用一个个独立嘅茶包冲嘅，另外有一大壶暖水可以自己加。由于小妹生飞滋，嗌咗个是日养生汤补下，当日系沙参玉竹花胶炖螺片汤。个汤真系好足料，饮落好甜，花胶汤就啱晒我呢啲咁贪靓嘅女仔饮啦。攞胆春卷：呢个创意点心其实就系喺个春卷上面放咗海胆，但好味在佢嘅春卷炸得好香脆，入边全部都系虾，连埋海胆同埋下面果啲自制沙律酱一齐食，估唔到有几夹㖞。蒜香脆脆虾饺王：呢个10分推荐，因为从来冇食过外皮系脆嘅虾饺，外脆内热，蒜香味都几重，连埋面头嘅千岛酱一齐食，完全唔觉得自己食紧虾饺，好特别。提提大家食嘅时候要小心啲，因为入面啲虾真系好热㗎。笼仔酱爆黑椒牛仔骨饭：朋友好钟意食笼仔蒸饭，牛仔骨好入味，送饭一流。小鲜肉小笼包：食亲点心我都必食小笼包，呢度嘅小笼包好大只，外皮又唔会穿，仲有好多汤系入边添呀，啖啖肉，正！另外嗌左个白灼靓菜心，不过不失。总括嚟讲，呢间点心几有特色，经过嘅朋友仔可以一试。