大麥牛肉麵 (已結業)

虽然小店嘅野食选择唔多,但毎款都相当吸引呢。今日去食晚餐,卤味鸡脾饭已经卖哂,睇佢餐牌嘅相真系食指大动,唯有下次早啲黎食啦。另外,餐牌嘅相都显示左小食嘅份量,明买明卖,唔会话上菜后先觉得太多或者太少。小食叫左红烧萝卜同皮蛋豆腐。萝卜煮得好上色,入味,好淋,无渣。皮蛋豆腐个重点系个汁到,系有微微嘅醋味,劲开胃,本身我唔系好接受到醋嘅好重酸味,但依个系好淡淡的醋酸汁,对我来讲几有惊喜,觉得个汁有得沾冷面食嘅话都会唔错呢。主食有卤肉便当，饮食均衡,仲有蛋同青菜呢。卤肉唔会太肥,切得比较大粒,有啲咬口,仲有啲菇粒,几香菇味,捞饭食真系唔错,啲卤肉汁嘅份量都岩岩好,唔会太多令个饭太湿,又唔会太少汁最后斋食饭咁。仲有叫左红烧牛肉面。面条厚身,几有咬口,汤头有啲莞茜同葱香,都唔会太咸,就咁饮都几好饮舒服,牛肉比较薄切,咬几啖就有啲牛肉味。饮品点左桂花薄荷酸梅汤。闻到同饮到桂花香味,薄荷味都几清新,酸梅汤个味就无平时个啲咁酸,饮到底仲见到有洛神花呢。食完野,出到门口睇一睇,原来星期一佢promotion劲平,最高有6折,下次真系叫多啲人一齐去食,食得多啲野又多啲折。