住家飯

营业中

休息中

听谷友讲置乐开左间新餐厅，做紧打边炉放题$148/位，仲要免加一免酱料费，真系好平㖞，是晚就同朋友黎试下佢。地点唔难揾，喺好出名嘅鸡煲店隔离，晚市除左火锅任食，仲有小菜、碟头饭等，全部价钱都好亲民。晚市放题由五点开始，怕人多一够钟即刻黎到餐厅，呵呵，店内暂时只有两枱客未使等位。汤底有八款选择，我地拣左蕃茄薯仔锅，原来个锅已设定为鸳鸯锅，早知拣多款汤底啦😌肉类用qr code落单，其他火锅料就自助区度拎，虽然卖相平平，但牛肉同猪肉片都唔错，牛肉片不算太肥，猪肉片嫩滑好食，鸡件其实都几滑无雪味，但就切得大件左少少。自助区嘅火锅料有丸、肠仔、午餐肉、各样蔬菜、饺子等，另一区有炸鱼皮、响铃、生根等，refill得快不用抢。饮品同样自助，有一般罐装汽水、支装凉茶、纸包饮品等，仲有罐装啤酒，但支装啤酒就要额外付费了。最后就食埋甜品先，有蛋糕仔、杯仔等，都几多款口味㗎😋$148全包价食两个钟，真系抵到无朋友，唔怪得一阵就全店满座啦。