Villa Villa

营业中

休息中

之前朋友订过呢度嘅生日蛋糕俾我，图案好搞鬼又好味，一直都想揾机会黎试下主食。作为明太子爱好者，一望到个名就叫咗明太子鲜虾意粉，非常高质。 首先就咁肉眼睇已经见到每条意粉都沾满左粒粒明太子，煮得啱啱好，仲感觉到同咬到卜卜声咁。 蒜香榄油意粉本身都好香，加埋明太子嘅咸香好夹，鲜虾用料都唔错。自家制烟熏芝士帆立贝意大利云吞卖相同幻想中一样咁creamy，云吞咬落好烟韧，芝士味香浓，帆立贝煎得啱啱好够嫩滑。烟三文鱼双重芝士脆薄饼系见到人哋张相已经想试，双重芝士符合到我邪恶拉丝嘅期望，饼底好薄好脆，芝士底下更加搽满咗蕃茄酱汁，每一啖都好滋味。 烟三文鱼都好肥美厚肉，同软滑有奶香嘅芝士好夹，系必须要加嘅配料。黄金炒薯条咸蛋黄味超浓，其实呢个组合都唔系啲咩新嘢，但同坊间食到嘅相比，呢度薯条明显好干爽，咸蛋黄食到起沙嘅质感，同埋每一条薯条都沾满左咸蛋黄好够味。