我的意大利廚房 (已結業)

今日过开湾仔做嘢，就揾埋两个喺湾仔返工嘅朋友食饭，朋友负责订枱，就拣咗呢间意大利餐厅，环境唔错，好适合三五知己倾吓偈。佢每一个lunch set都只不过系百零蚊，以呢区来讲再加埋呢间餐厅嘅质素，真系几超值，性价比相当高。呢度嘅餐包份量好多，而且佢唔系配牛油，而系配蒜蓉同埋芝士粉，我第一次食呢个配搭，新颖得嚟又几夹，估唔到餐包就已经咁有惊喜！唔同嘅餐就配唔同嘅汤，分别有蔬菜汤同埋杂菌汤。两个汤都份量十足，而且仲好香浓，非常醒胃。薄薄嘅薄饼饼底上面铺上南瓜片、香叶、蕃茄酱同埋芝士，因为够哂正宗，就算冇肉都觉得好好味！牛扒好大块，肉质非常嫩滑，再配埋大量嘅沙律菜同埋少少薯条，我觉得呢个配搭都几健康！呢个忌廉汁尖通粉味道比较简单，忌廉汁好香好滑，而且佢嘅浓杰度啱啱好，所以每条通粉上面都可以挂满忌廉汁，正！最后配埋一杯冰冻嘅柠檬茶同埋小小嘅甜品，最紧要就系可以同埋朋友一齐开怀畅饮一餐，真系大满足！