Our Little Dream (已結業)

今次又去咗将军澳Donki附近嘅餐厅食嘢，呢间our little dream系一对90后嘅夫妻经营，佢哋两个小朋友都喺舖头入面玩，感觉几温暖，同时厅亦都有格调，食物质素颇高。今日叫咗lunch set嘅自家烟熏猪腩片卡邦尼，套餐有沙律，沙律完全唔求其，系用幼苗版嘅罗马生菜，再加左啲焦糖合桃，酸酸甜甜。呢个意粉卖相一流，上面有好多芝士碎，搅拌左之后成个意粉好creamy，每啖都有芝士嘅奶香味，再加上好有口感嘅烟熏猪腩同埋蘑菇，系一个好高质嘅卡邦尼意粉，食得好满足。饮品方面叫咗Banana oats smoothie，食午市套餐只需要加25就饮到，质感浓厚，除咗有燕麦之外亦都加咗啲提子干一齐打，个smoothie好厚身又清甜。再叫咗个蛋糕，蛋糕份量一个人食啱啱好，味道适中，唔会太多cream令到人食到好腻，蛋糕中间亦有一啲红桑子蓝莓等等。