扒王之王 (已結業)

今日又去咗沙田，同事又带我去揾嘢食，嚟到扒王之王，而家扒王之王分店已经唔多，原来呢度食lunch都几平，而且好多选择。未试过食lunch有餐厅俾咁多选择你，因为通常要够快，厨房唔会预备咁多餐牌畀你拣，见到咁多选择，已经好开心！ 拣咗极黑猪扒配鸡扒饭$58，餐饮热咖啡，餐汤红汤。餐包先上，热辣辣软绵绵的，口感好，食得又开心。餐汤拣咗红汤，喜欢罗宋汤，里面有什菜，感觉健康啲。用料充足，洋葱萝卜唔少得，煮到出晒味，罗宋汤微酸，饮完好开胃。见到分量都唔算少，猪扒同鸡扒大小差不多，看似细块，但因为厚身，所以感觉都几抵食，有豆角，粟米，甘笋做配菜。鸡扒好厚肉，形状又切得靓，果然系扒王之王。外面香煎过，所以皮有少少脆，肉质嫩滑，最紧要厚身啖啖肉，又有肉汁，鸡扒超推介！猪扒就唔系想像中咁特别，边位有筋，但其他部分猪扒肉都好爽口，煎得都唔干，几好食，比鸡扒薄身小小，但都比起其他茶餐厅算大块。餐饮热咖啡，淡咗啲，唔够咖啡味，可以浓番少少就更加好。