我愛慢煮 (普慶坊) (已結業)

朋友个要求食个平靓正西餐，随即谂起呢间慢煮良心小店，之前已经帮衬过孖沙街分店，原本懒行楼梯想去返同一间，但已经满座，唯有做下运动上山去普庆坊分店，呢间分店嘅位置有啲隐蔽，但门口有大大幅老虎壁画，所以都唔怕揾唔到。小店采用半自助模式，自己拎水同餐具，落单后由店员会送餐，因此唔收加一，而且价格非常合理，个人觉得普庆坊分店嘅水准稍高。🍽安格斯顶级西冷牛扒（小）之前试过平铁牛扒觉得较多筋，今次就试西冷，切开后带少少粉红，保留到肉汁，肉味香浓又唔韧，推荐！🍽秘制保湿带骨猪鞍架店员话呢款要等15分钟，压轴岀场果然冇令人失望，一如其名唔会干争争，仲几爽口，外层微焦，调味偏重但我觉得可以同西冷一较高下。🍽炸番薯条食扒当然要配薯菜，甜甜嘅番薯条新鲜炸起，份量又多，点蛋黄酱好好食，不过佢淋得较快，大家记得趁热食。🍽墨西哥粟米花呢款喺其他慢煮餐厅较少见，原条粟米搽上香料同烧烤酱后烧香，卖相一流，少辣惹味。🍽芝士温泉蛋大啡菇呢个组合大家应该唔陌生，厚厚嘅大啡菇铺上芝士焗香，一切开温泉蛋蛋汁涌岀，唔好食就奇。☕️热情芒果特饮行完楼梯好渴叫左杯特饮，应该系雪碧加水果糖浆，冇乜特别，下次会试吓手工啤。