問卷手卷專門店 (已結業)

即食手卷食手卷最紧要系乜嘢，可能有人话系温度，有人话系饭嘅品种，又有人话系送嘅份量多与少。而我觉得最重要嘅系紫菜嘅脆度，热辣辣的饭外面包住紫菜，一定要系脆卜卜先好食的，如果淋哂的话咬落去会好韧唔好食，而且紫菜𠮶阵香味都会无左，会变左d湿淋的味道。点样先可以喺块紫菜仲脆嘅时候就食到？秘诀一定系快，即包即食，入面d饭暖笠笠之余，外面仲脆就好正。好多外面的日式餐厅都做唔到呢样，毕竟系因为程序好多，又落单又要整又要送到你张枱，到你食到嘅时候，无十分钟都八分钟，想热食都难。葵芳广场一向都有一家呢种即食手卷，一向都人来人往，好好生意，近呢一年开左呢间问卷，都系同一种形式，都一样人来人往。今次就试左呢间，叫左两条三文鱼腩手卷，又几足料㖞，条三文鱼好厚身下，仲要差不多成条手卷都有三文鱼，再加埋d青瓜丝，先至21蚊一条，物超所值。加州太卷--一条有6卷(未记得影相已经喺甘落酱)，有青瓜，蟹柳，蟹子等等，味道唔算太特别，正常味道。我觉得呢间最特别之处系可以落好多种唔同味道嘅酱，有成10款左右比你自己落，好中意酱汁嘅我就最好，可以食下一啖呢个味，一啖𠮶个味，丰富得很。