嵐本 (已結業)

喺附近返工，食饭黎黎去去得𠮶三间好食，岚本系其中一间。同事钟意食隔离半岛，讲真，嘢食系非常好，但我自己觉得半岛嘅节奏太快，食嘢有少少压力，有时候想静静地食个饭，俾自己休息吓，我就会黎岚本。香港生活节奏已经快到吓死人，如果食饭都要好急，真心会觉得好大压力😗。呢度嘅餐牌好简单，早餐、午餐、常餐、下午茶，唔会花多眼乱，最适合我呢啲有选择困难症嘅人。而且呢度嘅姐姐会好贴心咁话我知有乜拣：火腿肠仔定餐肉？炒蛋定煎蛋？多士定奶油猪🐽？总之你就算唔识字，都可以喺度食到自己想食嘅嘢(不过唔识字就唔会睇到呢度哈哈哈🤣) ！今日黎食午餐，例牌要咗我最钟意嘅葱油鸡扒捞麺🐔！超大块厚鸡扒，嫩滑又 juicy，加上葱油嘅香味，食到停唔到！啲麺嘅软硬度都啱啱好，完全唔知厨师点做到。通常想食奶油猪，要去大家乐下午茶先食到，但喺岚本，早餐或者午餐都有得食！！我钟意又香又脆嘅奶油猪仔，返咗半日工，黎一丝甜甜嘅炼奶，生活就系需要多一点点甜，先有动力撑埋下半日 ❤黎呢区返工几个月，庆幸有呢间小店，照顾咗我一日两餐，真心推介俾大家，不过我有少少私心，希望唔好成日咁多人，因为我唔想等太耐 LOL 😆