茶木‧台式休閒餐廳 (PopCorn 1)

营业中

休息中

琴日刚去完旅行返黎，今日婆婆就急住揾只孙。咁就顺便一齐食个下午茶同去行下街啦。食下午茶系因为我地都瞓到好晏呢。一心谂住去茶木食下午茶，因为记得上次去食个下午茶好抵架嘛，比净叫一碗面平，重要连饮品，但份量又唔系细好多。点知今日去到话冇下午茶㖞我问左两句点解冇左既？我老公就嫌麻烦，话冇所谓啦，可能系我记错，或者假日本来就系冇下午茶呢。我心谂我有所谓㖞，有下午茶同冇下午茶个价差好远架嘛。冇下午茶我可以去第二间食。真系未食就已经谷住谷住。食食下，我见另一枱都有人问，点解冇左下午茶，即系唔系我问题。仔同老公都系叫牛肉面，一如以往系好味的。最钟意个汤。我既例牌，盐酥鸡面，佢地既盐酥鸡真心好味，切起既大细亦都岩岩好易入口，另外个汤，真系好好味。一向食面，拉面，车仔面，牛腩面果D我都唔会饮个汤的，系茶木个汤，我每次都会饮。因为冇包饮品，只系叫左杯珍珠奶茶同老公Share饮。婆婆点的士多啤梨多士，因为婆婆食左lunch先出黎呢，所以佢就叫个甜品，等我地食完面一齐食啦。讲真，茶木既多士靓就真系好靓，影相打卡系一流。不过口感同味度呢，我就麻麻地欣赏啦。硬过石头，咬完口都痛，味就普通雪糕果D啰。