大一海鮮火鍋料理 (已結業)

入秋开始有啲凉意，最啱去打边炉，最近都比较钟意去楼上、环境阔落嘅火锅店，今次呢间大一都几合我心意。古越龙山醉鸡锅 (半) $199 一上枱就闻到好香嘅酒味，药材味相对淡少少，鸡嘅份量都唔少，拣呢个锅可以叫少啲肉🤪。黑猪腩片 (半) $138、羊肉片 (半) $108 超超超薄切，虽然我都几享受渌一渌就熟，但今次啲肉系薄到一渌就会散开，厚返啲会比较好。但撇除厚薄度嚟讲，肉味、肉质都系中上，抵食。鹅肝墨鱼丸 (半) $78 墨鱼还好，但咬到中间就散发劲香浓嘅鹅肝味，爆哂啲油香出嚟，好惊喜。黑松露带子饺 (半) $68 黑松露唔会一pat过，而系好均匀咁散布喺成份馅料中，食落成旧都劲香，中间带子亦够哂鲜甜。山葵芥末虾饺王 (半) $58 虾够大只弹牙，加上微微刺激味蕾嘅芥末，提鲜之余，食得好过瘾。珊瑚蚌 (半) $78 抵叫，不过略嫌调味过咸，但价钱嚟讲真系几抵。虾滑 $38 虾味都几出，应该几足料，食起上嚟够哂Q弹。响铃 (半) $38 即炸，脆口唔油腻。稻庭乌冬 (半) $28 好钟意食稻庭乌冬，不过呢个乌冬仲系冰嘅，如果有已解冻嘅会更好。香菇贡丸 (半) $38 香口弹牙，猪肉肉味出。