霸王山莊

营业中

休息中

新年期间两老同亲戚黎食饭，派左$500现金劵比佢地，所以今日同老友食饭，顺便黎用埋佢，今日见到厨师推介几款菜，所以叫左呢几款，有话梅醉乳鸽，脆爆牛柳丝，烧羊腩，再叫返餐厅基本食品，必食北京烤鸭（半只），赛螃蟹，蚂蚁上树。醉乳鸽-好好食，酒味浓，一啲苦味都无，仲有入口好香甜嘅话梅味。牛柳丝-食落好有上海前菜脆鳝嘅口感，味道一流，我个人食左大半碟。烧羊腩-配左啲薄饼，连埋八款配料及酱料包住黎食，感觉几新鲜，不过又唔系太大惊喜，但都合格有余。北京烤鸭-依然出色，肉唔太多，鸭胸位置皮与肉之间一小层脂肪，入口甘香，另外鸭背无肉嘅地方，片片都似薯片咁脆口，直系好好食。赛螃蟹-蛋香味浓，加埋黑醋食真系好鬼好食，入口就知即叫即做，因为蛋白实在太滑，唔似我曾经喺酒楼食过果啲入口就知做定翻煮，所以呢度真系正。蚂蚁上树-炒得好干身，我平时都唔太食粉丝，今晚夹左2碗黎食。今晚用$500现金券埋单，真系感觉好抵，值得再一次帮衬。