利強記北角雞蛋仔

营业中

休息中

今晚喺尖沙咀食完晚饭后仲有啲口痕，谂起附近有间利强记北角鸡蛋仔好出名，就行去佐敦方向，想试下鸡蛋仔。大约九点行到去，有一条短短嘅人龙，大部分人都系游客，证明利强都好强人气！以为有人龙要等一阵先有鸡蛋仔，点知俾完钱都唔使一分钟就有得攞！仲要攞上手系热辣辣嘅，所以我同朋友仔都好兴奋，影咗张相就即食。第一啖都几好味，觉得又热又脆，点知继续食嘅时候就觉得好干。完全唔系外脆内软，而系外脆入干。食咗四份一到，就发现有㶶味。我哋都忍唔住攞起个鸡蛋仔望下，就算天黑啲色睇唔清，都发现个鸡蛋仔好深色，完全焦咗。最后都好勉强食咗啲边边冇咁㶶嘅，都有三份二食唔到...今次嘅鸡蛋仔都几令人失望，都明白人多要赶住做系有压力，不过都要保持一定嘅水准。之后有同其他朋友讲起，佢哋都话北角𠮶间好似比较有保证。所以如果再食利强记，净系会试北角𠮶间噜。