古早味台灣原味 (已結業)

平日晚同朋友来食饭，好彩有book 位，闲日都好多人呀。😖 店内有bar台座位，下次都可以试下一个人来食。我哋要咗个2人养生鸡汤（$98），上台𠮶阵时好热辣辣，每人都饮到3碗呀。 佢药材味好浓，仲有成支参系入边，加埋6-7旧好嫩滑嘅鸡肉，值得一试。 台式一定会食嘅 古早味牛肉面（$65），佢个粗面好好食，有3大块牛肉，煮得好淋。 个汤汁都好好饮，冇味精。另一个台式一定会食嘅系 台式卤肉饭（$58），超级多卤肉舖喺面，啲肉肥瘦啱啱好，两个人食都觉得好大碗。饮品一人一杯，朋友要咗杯热嘅黑糖珍珠鲜奶（$26）（左边），我就要咗杯冻嘅黑糖珍珠奶茶（$22）（右边）。个人觉得热嘅好似好饮啲🙊，2杯都偏甜，好多珍珠。最后忍唔住要多个甜品，我地食咗个 柠檬爱玉（$28），佢系成块柠檬放咗系面，下面有杞子同超级多爱玉，滑嘟嘟嘅，饱肚都仲食得落！今餐食得好饱，有参汤有面有饭有甜品，每人大概$160左右，系值得嘅！