住家菜 (已搬遷) 新店位置

本来去开尖沙咀食饭，如女友想食小菜都会去妹记，但听朋友赞好食又抵食，亦讲到平时排长龙嘅铜锣湾住家菜，原来响尖东都有，未食过，所以便去试试。去到九点左右，无乜人，连位都唔使等。同女友两个人不算食得太多，叫了一个鲍鱼鸡粒竹筒饭，梅菜蒸肉饼同埋榄菜肉松四季豆，我自己再要多一碗例汤。先来例汤，系赤小豆粉葛煲猪𦟌，同佢地所标榜一样不含味精，一小碗十五蚊都可同女友共享，唔错！四季豆比较油咗少少，但送饭一流，算系小弟最爱；梅菜蒸肉饼不会蒸得太干，略嫌薄咗啲，同埋如果多少少豉油就好喇！至于竹筒饭都几好味，啲鸡肉几大粒，而且有饭香。饭后侍应送上两碗五花茶，清清地不太甜，比凉茶舖嘅五花茶，佢无咁浓药材味。总括来讲环境企理，食物又唔错，确系一个几理想嘅饭局好地方，尤其适合两口子去食，若然一大班麻甩佬又恐怕细碟得滞，会去番妹记。不过顺带一提，门口系有个牌写上是日晚餐，最好坐低后再问问侍应，因为佢地只会递上散叫餐牌，又唔会提你有晚餐。最后到离开时女友同我讲：「咦！点解唔记得叫晚餐？抵好多㖞！」