醉忘魚屋 (已結業)

今次生日饭拣咗呢间日本嘢，第一次嚟，间嘢唔算好大，大路日式装修风，都坐得舒服。估唔到有好几样嘢食都俾到惊喜我！前菜系日出(蕃茄)。以为只系个名改得特别，味道都系普通酸酸甜甜嘅冻蕃茄，点知入面系有啫喱，蕃茄嘅爽加上啫喱嘅弹，口感非常丰富，味道酸甜，好食！前菜已经有小惊喜。再嚟系特上刺身四点盛。件件都厚切，好新鲜，好鲜甜，大拖嘅油脂好均匀，好香！做到佢应有嘅质素！呢个矶煮鲍鱼好爽口弹牙，唔错！萤光鱿鱼冲渍，用嚟送酒一流，斋食就偏咸。大惊喜就系呢个吞云吐雾，唔单止好睇，仲要好食！店员仲好贴心咁等我哋相机ready先开盖。一开，烟雾弥漫，阵阵苹果木烟熏味涌出嚟，芝士入口即溶，咸香加上木香，令你味蕾大爆发，再加上炸完超脆口嘅紫菜，条脷简直可以系口腔入面跳番part舞。呢个系必叫嘅！味醂鱼干都好好食，甜甜地，腍得嚟又有口感，唔洗沾酱已经好好食。串烧牛舌同鸡软骨，正常，冇特别出色。呢个系鱿鱼塩辛芝士，都几特别，芝士好香好creamy, 加上鱿鱼嘅弹口，送酒一流。最后系醉忘蟹肉味噌炒饭，炒得好干身，蟹肉都算多，几香，唔错。餐饭食得好开心，好食服务又好，菜式好特别，有惊喜，会再帮衬。