8鍋臭臭鍋 (金巴利道) (已結業)

同朋友去开尖沙咀行街，系尖沙咀食野不嬲都无乜心水，最多都系去食FOOD COURT，但朋友话附近有间台式臭臭锅，之前成日去台湾都未真系食过，于是今次决定试下新野。朋友话呢间野好出名好多人排，但可能因为平日关系，我地去到等左无耐就有位啦。店舖唔算太大，但系坐落去感觉唔会太逼，环境都算舒服。朋友叫左个小辣既「台式麻辣锅」，呢度既辣都唔好讲笑，就算平时我都会食辣，但呢度既辣真系好够辣，试左朋友个个两三啖都唔系太食到落去，不过系真系好惹味。入面好足料，加埋个公仔面，感觉有D似韩国部队锅。因为我自己对臭豆腐无太大兴趣，「8锅」虽然主打臭臭锅，但系除左臭臭锅之外，其实仲有好多其他选择，最后自己拣左个「芝士牛奶锅」黎试。呢个芝士牛奶锅真系一试难忘，牛奶味好浓郁，加埋块芝士溶落个汤度，真系不得了！食到最后，我差唔多成个汤都饮埋，汤底最赞！成个锅都好足料，有娃娃菜、白豚肉、贡丸、麻蟹柳、金针菇、蛋饺……跟套餐又有鸟冬同白饭，食到好饱好满足。虽然话系一人一锅，但系呢间野一个套餐已经食到好够饱，所以就无再叫到Ｄ咩小食。两个人埋单平均每人都系100蚊松D，系尖沙咀食到呢个质素既餐厅，算系物超所值。