浜滝

营业中

休息中

今日去左间几好气氛的居酒屋，同朋友食少少野，饮返两杯都唔错，值得推介。大阪烧饼 $88暖笠笠的大阪烧饼，面层仲有好多木鱼丝，扭吓扭吓，见到都想食。一啖食落去内容丰富，啖啖杂菜仲有不同配料，有层次的口感。味道绝对跟足日本传统，可惜份量唔算多，double size 我都应该食得晒，因为真系超好味。生啤 $60此情此景，当然即刻啤啤佢，系来自 japan 的生啤。花鱼烧一夜干 $88除左烧饼，去居酒屋我最喜欢食一夜干，贪佢够晒风味。用盐腌过的鱼干，烧起上来又咸又香。表面香脆，但鱼肉又一D都唔会干。加点柠檬汁吊吓味，豉油都唔使点就食得。配上冰冻啤酒，真心冇得弹。花田锅 $168见个名几得意，叫来试试，原来系豚腩什菜㷛。一大盘娃娃菜排得好靓，仲有好多粟米同菇。中间夹杂著豚肉，真系成个盛开中的花田咁。汤底系浓浓的猪骨汤，冇味精好清甜，蔬菜索晒个汤底真系好美味。豚肉系腩位，半肥瘦，又香又滑，滚起真系好香。仲配上秘制的辣汁，点少少越食越滋味。店仔细细，但布置同装饰都好有心机。全晚播住日文歌，加上够人气够旺场，好味又有气氛，会再来。