蝦棧 (已搬遷) 新店位置

今日同朋友行完花墟，谂住系附近揾食，行行吓见到有间叫虾栈嘅餐厅，望吓餐牌，估应该系台湾嘢黎，价钱唔算太贵，又见到入面都唔少客咁，所以朋友同我就决定试试。餐厅睇落唔算大，有啲似小店feel，未够七点都已经坐满哂人，walk in 嘅朋友要留意一吓。坐低即睇睇餐牌有咩好嘢，因为知道虾煲系招牌菜之一，所以我哋首先点咗个黄金虾煲，之后再点咗溏心蛋，醉鸡，一口豆腐，同油麦菜。朋友闻到隔离枱个捞面有好香嘅麻油味，所以再加咗单。虽然系小店，但上菜速度都ok，等咗一阵，头盘就黎啦，先食溏心蛋，腌得好入味，可以话系满分之作，一碟四件两个人啱啱好，多一个人都可能会打交。之后试醉鸡，成碟切片去骨，卖相似寿司咁款，食落好有花雕酒味，但又不至太浓，好啱女仕口味。跟住到一口豆腐，上枱第一眼冇乜特别，色泽比想像中较浅黄，但放入口一刻就好唔同，热辣辣之余，仲外脆内软，虽然系油炸，但食落唔觉油腻，抵赞。食到差唔多，主菜黎啦！黄金虾煲，一睇就知系邪恶之物，好好味，一煲有八只虾，两个人分都好够，其实黄金虾只系其中一种煮法，我见餐牌有好多口味可以拣，所以应该总有一款系你杯茶。话明煲上，当然系热辣辣啦，食嘅时候真系要小心辣嘴。