茶茶台式料理 (已結業)

好耐都冇去过台湾旅行，挂住台式美食，今日同朋友去旺角【茶茶台式料理】大快朵颐。呢度有台式火锅，嗜辣嘅我地点左茶茶麻辣锅($108)，选左魔鬼辣。材料有牛肉、贡丸、花枝丸、鱼蛋、蚬、枝竹、豆腐、粟米、冬菇、金菇、椰菜、娃娃菜等，仲有大大个即食面插喺个锅度。配料每样都有一粒，名副其实的一人锅，不过款式够多都一定食得饱。魔鬼麻辣汤底辣味劲, 麻味轻，仲招驾得住。滚到最后嘅菜同即食面就最刺激。小香肠拼盐酥鸡粒 ($46)可次一试齐2款小食，最啱我呢D心多多嘅人。盐酥鸡粒炸得几香口可惜有D干，台式香肠就同台湾食倒嘅一样咁好。朋友嗌左咸酥鸡大佬啤酒($45)，包装有个大只佬好过瘾。啤酒并唔系咸味，饮落充满水果香气，到尾有回甘，用嚟配煎炸食物就啱啱好。芝士蟹柳蛋饼 ($48)一定要衬热食，蛋饼外层香脆，里面芝士同蟹柳好足料，新鲜食先会有半溶嘅效果。加埋个甜甜地嘅酱汁，味道唔错。