Ember (已結業)

嚟呢间本身想食威灵顿牛柳，点知卖哂食唔到。但其他嘢都睇落唔错，照叫咗两个set dinner：先有一个大蒜薯仔忌廉汤，不过食唔到好重蒜味，女朋友唔食蒜都饮到，薯仔味就好够又唔太腻，份量岩岩好，个餐包细细个都几好食。前菜分别叫咗鲜青口意大利粉配蓝芝士忌廉汁，同北海道带子刺身薄切配黄金意大利饭（好似冇乜试过前菜有咁多淀粉质食）。个忌廉汁好香，以为有芝士会好浓味但又唔算，青口都算几新鲜。带子刺身同意大利饭呢个组合都几特别，黄金应该系指有粟米。主菜分别叫咗咸蛋黄虾龙虾尾配龙虾汁扁意粉，同埋烤美国熟成肉眼扒。个龙虾意粉有咸蛋黄个味几有层次，龙虾肉都爽甜。牛扒佢一上碟𠮶时叠住咗啲配菜，原来仲有薯仔同菠菜车厘茄，仲有黄芥末同黑椒汁点，煎得几靓几juicy。另外再叫咗两杯cocktail：一杯mojito，清新消暑，饮完凉浸浸；一杯old fashioned，酒香好够，又带有焦糖嘅甜味，细细杯都够回味。两个set加嘢饮加一，九百几蚊，算中高档餐厅，有兴趣可以一试。