大丈夫食堂 (已搬遷) 新店位置

上次提到小弟系一个吉列猪爱好者，得闲冇事都会去食下吉列猪。除左啲出名嘅过江龙之外，系长沙湾都有一间人气热店，佢就系大丈夫食堂，相信住系附近嘅师兄都有听过，今日就一于去睇下佢系咪真系咁神。今日系平日11点半黎到，可能就到食一黎已经见到有人龙。都系𠮶句啦，如果啲嘢真系好食嘅，等下又有乜所谓姐。由于铺位唔算好大，等左大概30分钟先入到去。但店员服务态度都几好，安排得好有耐性，排队嘅时候都好有秩序，冇咩混乱嘅情况出现。小弟一行两个人都叫左吉列猪扒定食，眼见店入面其他人都有啲人叫各种鱼生饭，不过既然呢间嘢专门食炸猪扒，咁第一次黎就冇理由叫其他啦系咪先？呢个定食包左一大份吉列猪，一啲椰菜丝，味噌汤同埋茶碗蒸。先讲下主角吉列猪，真系好大份！同埋因为即炸嘅关系，上台都仲脆卜卜，炸到出黎都唔会话好油腻，亦都好有油香，同埋因为块扒大过碗饭好多，真系做到啖啖肉嘅感觉，至于只汁就正常。其他嘢嘅表现都正常，唔系话佢地唔好食，汤同埋茶碗蒸都好热辣辣，只系炸猪扒太出色，不过有佢哋嘅存在成餐饭完整好多。