醉鮮 (已結業)

冰火牛柏叶真系必食首选，虽然佢系冷盘，但佢嘅酱汁系食完会上瘾，食到你停唔到口，一嚿接一嚿。佢嘅酱汁味道有些少似细个喺啲街边档拮鱼蛋啲酱，少少甜同咸得嚟又辣辣地，非常惹味，送酒系绝配。牛柏叶够爽，食落冇腥味，如果有叫白饭真系会拎埋啲酱去捞饭食！炒米粉本身系无咩期待，因为平时周街都有得食。但系第一啖食落去，发觉米粉个质地系烟韧有咬口，唔系𠮶啲一咬就烂嘅米粉。而且非常之够镬气，味道拿捏好好，食到米粉味得嚟又唔会太咸/淡。平时食炒米粉都会落下甜酱，辣酱嚟吊下味。但呢碟炒米粉基本上啖啖米粉都已经好好味，重有啲炸猪油，虾仁，鱿鱼等配料，一定俾满分，必定Encore!!! 老干妈猪颈肉炒椰菜花，最紧要一定系试咗椰菜花先。一咬落去，质感爽口，非常挂汁同入味。真系有种魔力令你会夹完一棵再一棵，差啲都唔记得食个猪颈肉。猪颈肉就正常发挥，无咩特别所以都唔多讲。总括而言，呢间系非常值得推荐同尝试嘅大排档/小菜馆。入面好热闹，老细真系好好招呼，同埋成夜妈妈成1点钟都愿意做我哋生意，加上难得大厨重煮得一手好嘢食，真系执到宝。