一日三餐 (已結業)

饿咗西多士大半年，因为揾唔到好食黄茶记一直都无得食…难得今日放假出旺角近近地，谂住试吓「一日三餐」，同埋要试吓远近驰名嘅赏「花杏仁露」。星期五下午茶时间，无谂过咁嘅钟数都要排队等入，都排咗差唔多20-25分钟。如果唔系放假同埋一心想嚟支持吓，正常嘅我应该放弃咗。天气好热，响街头晒住咁排队，侧边仲有人推住铁车入出货入货，都真系有啲辛苦，还好食物质素值回票价。毫无沿念地点个西多士花生酱馅，但系响杯嘢饮度犹豫咗一阵：等到身水身汗有啲想要杯清爽啲嘅冻柠茶，但咁难得嚟到又好似应该试吓名物；杏仁露一般都热饮，冻又惊佢怪怪地…结果最后叫叫冻赏花杏仁露。西多士正常发挥，唔会食到满口油腻，又有蛋香，花生酱薄薄一层唔会太漏但又够晒味。冻赏花杏仁露呢，原本期望玫瑰系有味嘅，但原来只系做装饰；不过okay啦，gimmick嘅嘢，食得开心都系一件事。但估佢唔到真系好好饮！从来都唔特别中意饮杏霜，但呢个香味好浓郁质地细滑，好似系流质版嘅杏仁豆腐，好有惊喜！仲有就系，叫冻饮唔会default加饮管，环保之余可以大啖大啖痛快地饮，爽呀！下次啱时间有机会都会想返啅，希望到时仍然系要排队入💛