海記燒臘飯店

营业中

休息中

寻日食左餐咁贵嘅, 今日师傅决定食餐平! 但系师傅出去食晏时, 一出左门口就有一个疑问, 就系向左走定向右走好呢? 如果向右走, 师傅就好大机会去再兴, 但最后师傅决定向左走, 所以就黎左呢度食晏!当师傅黎到呢度时, 即刻喺呢度打左个圈, 最后谂住去清真惠记, 冇错系去清真惠记, 于是坐底, 但一坐底就出事喇, 原来师傅啱啱坐左喺清真惠记同海记嘅交界, 点知呢张枱原来系属于海记, 而海记个伙计好快就放左碗例汤喺师傅面前, 咁师傅唯有喺度食一餐啦, 睇左一阵师傅都系决定叫碟肥叉烧饭!肥叉烧饭好快就到, 卖相都唔差, 而叉烧确实几肥, 做到野㖞, 蜜味都几够, 但系就唔算好松, 烟烟韧韧咁, 有d似猪颈肉嘅感觉, 反而叉烧嘅感觉就唔多似, 不过加少少辣椒酱都几好味! 而例汤就系送嘅, 都煲得几够火喉, 冇味精几好!总括黎讲食物质素都可以, 价钱都叫相宜, 廿三蚊一碗单拼烧味饭, 廿五蚊一碟单拼烧味饭, 加一蚊就可以有双拼, 仲有例汤送, 都算抵食! 如果早知系食叉烧饭, 师傅就去再兴啦, 食烧味始终系再兴好d; 不过下次有机会都会再黎, 而笑脸都比得过!