新光粥店 (已結業)

唔知系咪真系昨日食左鸡, 喺禽流感嘅刺激下, 师傅今日终于病倒了! 但系病左都要食野架, 于是乎师傅就黎左呢度食个清清地嘅早餐, 之后再返去休息下!一间相当历史悠久嘅食店, 多年黎始终如一! 环境真系普普通通, 招呼真系冇咩, 只不过系随住时代嘅改变而增加左冷气! 入到去店内, 师傅自己求其揾个位坐, 之后睇下食咩好, 最后就要左碗艇仔粥同一碟斋肠!话都冇咁快两样野都摆左喺师傅面前, 于是师傅先试下个粥, 发觉粥底唔算绵, 加上唔知系师傅口淡淡定咩啦, 觉得粥系冇咩味, 而猪皮就几硬, 唔好味, 鱿鱼就好爽口, 唔错, 而碎牛肉都几好, 可以! 再试下斋肠, 斋肠本身都算几滑, 不过始终唔够"肠粉王"好味, 而豉油都几香, 好味; 而甜酱, 麻酱都系自己落, 丰俭由人!总括黎讲食物质素相比儿时真系差左好多, 勉强仍可接受; 卫生情况就麻麻, 师傅见到煮粥𠮶位执配料手套都唔带, 就觉得好污漕; 而价钱真系好平, 十蚊碗艇仔粥, 五蚊碟斋肠, 白粥都系四蚊碗, 系抵食不过唔叫好食! 食饱后师傅发觉都几口渴, 相信食物里都有唔少味精, 晨早流流本来谂住食个清清地嘅早餐, 点知就食左个味精早餐