新麻蒲 BBQ (已結業)

想试试新开嘅新麻蒲韩烧，点知夜晚已经full booking，唯有选择晏就去食lunch啦。新麻蒲嘅格局好有韩国风味，令食客好似置身韩国咁。 两个人叫咗个芝味烤肉套餐，包前菜、和牛寿司、牛肉、鸡翼、拼盘、饮品同埋甜品，当然唔少得靠炉旁边热力融化嘅芝士边啦！可能期望越大，失望越大。个人认为半生熟嘅牛肉寿司有D过韧，烤肉亦都太咸，掩盖咗肉嘅味道。芝士边加咗蘑菇食落好似食紧pizza上面个种芝士，有D奇怪，同烤肉格格不入。而且，芝士好快就会烧㶶，一开始就要食哂佢，又冇得refill，的确令人有D失望。虽然食物唔算非常出色，但呢间餐厅都有佢抵赞嘅地方。首先侍应非常友善，耐唔耐会行过来帮我地烧肉，又帮我地剪走烧㶶嘅部分。另外，叫套餐一次过可以试到好多种类嘅食物，唔系净系得肉。我地最后叫嘅甜品系黄豆粉刨冰，味道唔错好足料，而且非常大碗，但食完都唔会太济。2人套餐份量都几多，如过唔想食到好似我地咁太饱可以3个人分。呢个价钱食咁嘅质素嘅韩烧好似唔系好抵，不过呢个咁地道嘅韩烧有兴趣嘅朋友都可以试一试，但系我地就应该冇下次。