晶點 (已結業)

好中意食点心但天水围就真系无边间好食，经过西铁站去买𩠌时见到有间晶点，就叫外卖嚟试试。价钱就好亲民，好抵食，味道就过得去，可以试试，唔想煮饭时，亦可以食呢间。我地叫咗凤爪排骨饭－过得去，排骨都腌得好入味，但酱皇蒸凤爪就比较失望，个调味唔好，唔入味，无落南乳酱，唔好食。叉烧红米肠粉－系有啲视觉冲击嘅因为肠粉一般都系白色，但食落就无乜分别，我觉得个肠粉唔系即拉，同埋料唔算多，但味道过得去嘅。蟹籽花菇烧卖－一咬落去有啲散开，似系蒸得太耐导致，不过有食到一块块肉有啲咬口，同埋唔算肥，都系过得去。皮蛋瘦肉粥－呢个几好食，足料同埋煲得好绵密，下次都会再叫呢个。山竹牛肉球－几好食，同一般茶楼嘅水准差唔多，不过无比喼汁我地！古法马拉糕－太油，落得太多油，搞到抢咗啲香味，下次唔叫呢个。鲜竹卷配牛肝菌汁－竟然系炸嘅，唔系蒸嘅，同埋啲料都唔算多，味道一般。