Bigger Burger Cafe (已結業)

美食哥倫布今次去咗佐敦搵野食!有乜好野食？一齊睇下啦!去到Bigger Burger就梗係要去叫返個Burger食吓啦！大大話話都有成十幾款唔同嘅Burger選擇！另外仲有啲小食、飯/意粉類同飲品。我地分別叫咗兩個burger，一個係藍芝士煙肉漢堡，一個係黑松露炒蛋牛肉漢堡。藍芝士煙肉漢堡最特出嘅就係大大塊煙肉！長到突晒出嚟！漢堡扒好香好多肉汁，食落有少少藍芝士香。個包好多芝麻烘到好脆！黑松露炒蛋牛肉漢堡個樣仲靚！本身個包巳經好高，入面再加咗厚厚嘅炒滑蛋，顯得佢更加巨型！估唔到松露炒蛋炒得咁嫩滑！包脆蛋軟，再加上漢堡嘅口感同香味，真係好正！其實burger本身都跟咗啲薯條，不過見到有款係檸檬蜜糖酸忌廉味，所以另外加多份。個酸忌廉汁幾開胃，不過就無乜檸檬蜜糖味。底下仲有啲醬多，可以放埋自己啲薯條落去點醬食～士多啤梨莫吉托梳打要散叫，揀有冇酒精都得價錢一樣。朋友叫咗咖啡奶茶，而我就叫咗依杯，真係好靚！靚過普通飲品好多～而且加咗啲新鮮士多啤梨落去，可以當生果食，飲落去又唔會太甜，好味！