越發地道河內料理

营业中

休息中

想食越发好耐，但每次唔系劲多人排队就系已经卖晒，今次终于畀我食到喇～ 招牌牛柳牛丸粉： 呢个可能系佢地最受欢迎嘅粉喇，同一时间入座嘅十居其九都系叫呢个，如果以 $100 碗粉嚟计，佢个卖相同份量其实唔算好好，不过，佢个汤头就真系做得唔错，比起其他越南粉嘅铺头，钟意佢唔会太过油，亦唔会太浓味，牛柳同牛丸都好好食，佢跟埋个粉仲有啲油炸鬼、青柠同椒丝，先饮一啖原味汤再加青柠同椒丝可以好饮到中间嘅变化，如果肉嘅份量可以多少少其实都近乎完美。招牌越南脆春卷： 佢地嘅小食都系好出色，春卷上枱热辣辣，外皮非常之脆，用菜包住嚟食加埋入面唔同口感嘅菜料，食得好爽～ 越发牛油鸡翼： 呢个亦系出色，佢同坊间食开嘅越式炸牛油鸡翼好唔同，佢系鸡翼面有蜜糖再喺上面有好多炸蒜粒，又香甜又辛口，好食！越南滴漏咖啡： 本身谂住都系正路野叫杯野食下，点知都有啲惊喜㖞～！ 平时饮越南滴漏咖啡 经常都会阵苦涩味，但系佢呢个又无乜，仲有阵甘味，捞埋炼奶再甜的，好饮～！ 唯一嘅问题，就系一坐低就已经话 蕃茄蟹檬 已经卖晒，唯有下次再睇下有冇机会食到喇～。