一鍋堂 (XX Arcade) (已結業)

朋友约呢度食火锅放题，餐厅几大，连调味架都干净企理，饮品又多选择，抵赞。我哋要最丰富嘅C餐、胡椒猪肚汤底，嗱嗱临二维码自己落单。十几种牛、猪、羊肉，每样都试，再加少少海鲜、素菜，留肚食雪糕。个汤好足料，有好多猪肚，胡椒味可以再重啲。咁多种牛肉，真系唔识分，大部分都几好味。最钟意日本产黑毛和牛，觉得最有牛肉香、肉色同油花最靓，我哋仲encore𠻹！魔鬼辣安格斯牛肉，腌得好够香辣惹味，但一放落锅，连汤底都辣埋，可以迟啲先放。牛脷心托带点靭，觉得一般般。其实自己钟意食海鲜多过牛肉，佢嘅虾真系冇得顶，好鲜甜。蚬都唔错，吐沙算吐得干净。最开心系有白鳝片，又肥又爽脆，朋友唔食，自己一个食晒，哈哈。鸭血嘅口感唔错，但应该早啲落锅，等佢多啲时间吸收汤底精华。放题限时两个钟，睇准时间，赶得切食士多啤梨乳酪雪糕！圆满！店内poster话会员感谢祭，九点后叫C餐可任饮生啤同坐三个半钟，下次睇完戏过嚟都好㖞。