海港酒家 (已結業)

早两晚突然想食龙虾，啱啱经过呢间海港，见啲价钱又唔算贵，两个人都入去食啦！点知食完一肚火😤以后都唔再帮衬！我哋叫咗一个西澳上汤龙虾加伊面，自己拣龙虾，一斤二両重，明明拣𠮶只新鲜生猛，点知嚟到啲肉唔爽口，完全唔似新鲜龙虾，似系冰鲜龙虾😡最离奇系明明叫咗一只龙虾，但竟然有三条须，同一只半龙虾尾尾节部份🙄问个经理，支吾以对，问多两问仲走咗去😑我哋屋企系水上人，食海鲜多过食猪肉！明明系一只龙虾，嚟到又多呢样多𠮶样，一睇就知有问题啦！咁大间酒楼竟然咁样呃人😤另外叫咗个花胶豆腐菌煲，味道系几好味，但食食吓发现冇花胶嘅😳同个职员讲，佢话哎呀，乜俾漏咗啊😐然后收咗我哋个煲，转头拎返个有花胶嘅俾我哋😑我哋𠮶晚只系叫咗两样嘢，两样都有问题！叫人点会再有信心嚟食呀！😤