品越越式料理 (雅蘭中心) (已結業)

晚上七点去到都算几早，所以唔使等位。环境都尚算阔络，侍应态度好好，好好笑容，仲好识氹小朋友XD。言归正传,讲返食物质素方面，大致上都唔错，整体味道唔会太抢，太重口味。叫咗个软壳蟹米纸卷做前菜，米纸卷非常足料，软壳蟹加埋青瓜口感松脆，味道不错。芝麻鸡份量都多，口感鲜滑，不过略嫌未够熟，入面仲系有少少红。串烧有鸡、牛、猪颈肉，全部都好入味，不过猪颈肉有些少韧。至于青口椰香饭嚟讲，青口味道正正常常，唔会太咸，椰香汁同炒饭好夹，味道好好，甜而不腻。甜品叫咗芒果椰汁黑糯米，份量适中，酸酸甜甜味道不错。龙眼茶清甜暖胃。总括嚟讲，菜式价格稍高，不过有良好嘅环境，食物质素同服务搭救，值得一试。