燈籠滷味 (新都會廣場)

营业中

休息中

墟冚都不得了。12点半未够，已经入座七成，并且开始有人流蜂拥而至，有外卖有等位。限时60分钟。二人枱面均比较的式，自助手机落单，坐嘅89号比较适合一人，因为其中一张凳背靠电制酱料柜，耐不耐就有侍应店长嚟攞嘢开柜门，开柜门多数会撞到椅背，相当不胜其烦。宁舍有选择系$38「灯笼古早卤肉饭（小碗）」，size系平时住家饭碗白饭咁大，卤肉（东坡肉碎）肥瘦参半，预咗要自己加𩠌。墙上贴住仲系试业阶段，选择唔多，拣咗个另类送饭选择——「奶油芋泥、肉松、起司之人气葱抓蛋饼」$56。觉得面头浸章鱼小丸子酱可以撇走，唔夹，蛋卷嘅馅料味道已够丰富：咸肉松、厚重夹滑甜芋泥，芝士下手不重，味反倒比蛋淡。饮品冇跟餐就有轻微乸脷。「（热）清新冬瓜鲜草柠檬」单点盛惠$28。杯系某些茶记用𠮶种半漏斗型热饮杯，柠檬系台湾青柠，冇笃过都好够柠檬味，可能加咗柠汁打底。仙草作为热饮都唔怪异，以为会半溶其实依然呈块状。