Egg O’Clock (已結業)

作为打工仔，返工最紧要就紧系放饭啦！ 食番餐好嘅晏昼，绝对系成日嘅能量来源！喺葵兴嘅商厦KCC入面，听讲有间好高质嘅蛋包饭，究竟系真唔系？小编就专诚入去试试！KCC座落喺传统工业区入面，虽然由葵兴地铁站有天桥接驳，但讲真应该都系做附近打工仔生意多。喺商场嘅一楼就有几间餐厅，今日嘅目标就系度啦！ 店名叫「EGG O’CLOCK」，食哂字咁一睇就知系卖蛋料理。成个menu都系见到蛋嘅元素，唔同配搭嘅蛋包饭、三文治、常餐都有！当中蛋包饭嘅配搭仲好L多，牛肉、鱼柳、猪扒、汉堡，你谂到咩都几乎有齐哂！原条鳗鱼蛋包饭 套餐（$75)咁多选择，唔想谂就拣个最贵嘅！平时去supermarket买条鳗鱼都成50蚊啦，蛋包饭跟埋嘢饮都系75蚊，剩系个价都抵啦～ 虽然舖仔细细，但系门口都有堂食嘅台可以坐低食。唔洗十分钟，新鲜热辣就整起，老板仲好nice提醒食完要自己执返。哗！虽然系用外卖盒装，但摆盘真系一啲都唔马虎－原条鳗鱼真系成个盒打斜放先装得哂，鳗鱼煎得微焦，食落带少少焦香，鱼肉都好嫩滑！个蛋包饭真系落足牛乳去整，所以入口好嫩好滑，加埋海量嘅鳗鱼汁，送饭真系唔怕唔够汁！仲要有埋沙律菜，芝麻酱沟埋易入口。