和茶房鐮倉夢見屋 (已結業)

今日同家人到愉景新城行下，带埋3个小朋友去玩下。玩到咁上下小朋友话肚饿，本身打算去食个m记，但实在太多人啦，最后被呢度门口只大颠当猫吸引所以决定坐低食少少野。有机咖啡伴日本红豆蓉：咖啡上台时系斋啡，自己加糖之后可以加cream 落去，我就选择左唔加糖，一啖红豆一啖咖啡咁，咖啡味唔算香亦唔够热，红豆味偏甜但如果加埋落苦苦嘅咖啡入面就啱啱好。冻牛奶咖啡伴红豆蓉：因为本身杯咖啡入面已经有牛奶所以就冇提供忌廉，不过咖啡好似偏小，牛奶味够重但咖啡味略嫌淡左少少，本身杯咖啡都系冇落糖所以加埋红豆蓉一齐饮就刚刚好。白玉绿茶雪糕抺茶：有好香嘅抺茶味但偏苦，冇落到任何糖所以我老公饮唔惯，白玉弹牙尚算唔错，绿茶雪糕嘅绿茶味都好足够。士多啤梨喵pancake：小朋友一见到呢个甜品就开心到不得了，佢系一块厚嘅pancake上面有忌廉同士多啤梨，唔知系咪因为pancake厚嘅关系好难切，士多啤梨本身酸酸地加埋cream一齐食就刚刚好，不过50几蚊好似唔系几抵。另外仲叫咗一杯抺茶Latte冇影到，不过真系好苦冇茶味亦都唔系好够奶味。所以呢间野系食个环境同埋令小朋友食得开心啲，食物来讲未算太好但不过不失。