燒味滷師 (協邦大廈) (已結業)

团年饭除咗食盆菜之外，斩料都系一个好选择。今日同娘家团年，本来已经订咗盆菜不过人太多，惊唔够食，所以又买咗几盒烧味。呢间烧味店系红桥，原来仲要新开张。十分难得既系烧鹅系铺头烧（我偷睇到个炉），而家好多都系工场大量制作，现场烧真系买少见少。烧鹅系上庄，鹅肉好入味，皮都香脆又唔干，下次试埋个下庄先。我平时好少食烧腩仔，因为都贵，不过见新开又唔贵就买黎同家人分享下。初初睇以为好肥（我少食见识少），原来白色既唔系肥肉，而系嫩口既猪肉，加埋脆卜卜既脆皮，又唔会好似一般烧肉咁又实又咸，真系几好食，怪不得烧腩仔比一般烧肉贵啦！不过都贵得有道理。自己都成日整叉烧，不过就好干。呢间嘅叉烧就好多汁，而且半肥瘦啱啱好。$50半斤都几抵食，就咁食又得，叉烧炒蛋又得。最抵食喺客家咸鸡。帮你煮埋斩埋都系$59只，真系平过自己买只鸡嚟整呀！鸡都煮得火候刚刚好，肉嫩骨有少少红又唔会太熟。放工买只客家咸鸡，煮条菜就可以开饭，真系抵食好食又方便。