金山海鮮酒家 (已結業)

上个月做冬食完金山，埋单𠮶阵就顺手订埋团年饭，不过可能大厨提早放假过年，今餐水准竟然大跌watt。今日嗌咗上汤焗龙虾配伊面底，清蒸东星斑，鸡油豆苗，炸大肠，虾仁炒蛋，京都骨，辣酒煮花螺，小炒皇。今日除咗个龙虾正常发挥，其他都有啲失望。条东星斑虽然蒸得滑，但个豉油太咸，败笔。而上次食过好好味嘅炸大肠，今次则因为大部分切得偏厚，冇上次咁薄，而冇咗𠮶种超脆口感，唔系淋嘅，系唔够脆有少少硬。而个辣酒煮花螺，啲螺入唔到味，如果唔配埋啲汁同配菜食就会好寡。虾仁炒蛋啲蛋系滑嘅，但调味重手咗，偏咸。而今次个鸡油豆苗则太老，唔系炒过火，系啲豆苗本身就劲老，食落有渣。😔😔小炒皇正常，为咗凑齐8样，另外加咗个京都骨，不过送上枱嘅时候我呆咗，竟然系排骨嚟……以往喺其他餐厅食，唔系用猪扒整就系用一字排整，好少见人用排骨整，其实味道ok嘅，不过同想像有落差。总括今餐团年饭，整体都偏咸，同一向食开嘅金山水准差好远，味道仲差过新舖，极度怀疑系本身个大厨放假，其他人顶上主理，毕竟帮衬咗十几年，从来都冇失望过。🥲🥲