客家人

营业中

休息中

好耐冇同哥哥食饭，约咗放工食中菜，佢拣咗呢间位于长沙湾嘅客家菜，话前排同客人喺到食完，感觉质素唔错。餐厅主打客家小菜，选择亦非常多，家乡风味浓郁，而且有唔少少见嘅手工菜。一坐低店员先为我哋上茶同小食，花生香酥脆口，伴上少量盐粒，开胃可口。胡椒猪肚汤系我指定要点嘅，喺呢种夜晚翻风嘅日子，最适合饮返碗热辣辣嘅猪肚汤驱寒。胡椒猪肚汤超级足料，几乎大半盘都系汤料，汤底鲜香浓郁，咸菜味道突出，稍微掩盖胡椒嘅味道，饮落唔会太辣。椒盐鲜鱿非常够镬气，鲜鱿炸得够香脆，咬落外层松脆，肉质弹牙，加上惹味嘅椒盐同蒜粒，无论当小食抑或𩠌饭都一流。杂菜煲份量好足，近乎满泻，材料亦超级丰富，有鲜鱿、虾干、草菇、西兰花、白菜仔、生菜、娃娃菜、菜心、红萝卜、西芹同粉丝，所有材料用清甜嘅上汤浸住，又好味又健康。食饱饱之后店员仲为我哋送上暖笠笠嘅木瓜雪耳糖水，甜度适中，够哂滋润，好适合最近干燥嘅天气。餐厅食物质素唔错，而且份量好足，店员态度亦非常友善，令人有种宾至如归嘅感觉，好适合一家大细用餐。