陳根記 (已搬遷) 新店位置

好少入黎沙田行街，行完想食晚饭之际，醒起朋友之前有提沙田有个好地道嘅大排档陈根记，难得黎到，梗系要顺道食埋啦~未黎过呢度，所以揸车都揾咗一阵个入口。最后见有个停车埸，就念住泊好车再行落黎揾，点知一入停车埸就见到大大间陈根记。八点钟黎到，已经系超级多人。侍应话咁啱有张细枱，就叫我地过去坐。念住叫侍应落单，但侍应叫我地自己写。孜然一条骨 $70 - 超爱孜然嘅味道，所以叫咗呢款小菜。猪肉嫰滑有肉汁，咬落啖啖肉，但略嫌孜然粉唔多够，再加多d会更惹味。椒盐鲜鱿 $78 - 鲜鱿蘸上薄薄炸粉，炸得好香脆，鱿鱼厚肉弹牙。点埋个椒盐同喼汁，食到停唔到口。豉椒鹅肠 $70 - 鹅肠系食大排档必点。鹅肠炒得够晒镬气，够爽口。我自己觉得用豉椒炒系最正，汁好浓，惹味~ 可乐隔离有间甜品店，见我地差唔多食饱，走过黎俾咗张甜品纸我地。又几识做生意㖞~见都几吸引，又试下啦。芒果一口脆 (八件) $36 - 即叫即整。外层脆皮新鲜热辣，入面个芒果肉系冰镇过，所以外脆内冻。配埋底部好多嘅鲜忌廉一齐食，口感好丰富，又真系好好食。